شاعر صافی تبریزی در مدح حضرت خدیجه

(1 رای)

گوردوله تشنه جان ویرور منبع چشمه ی حیات

حیرته دوشدی قدسیان جمله ملائک اولدی مات

حضرت لم یزل اوزی گوتدی حجاب و حایلی

تا جبروت اهلینه گوستره اول شمایلی

یرده بولوردی جان ویرور وصل حبیب مایلی

ایستمدی او بینیده مانع اولا سرادقات

ایستدی بیر بیانیله شرح ایده بو مصائبی

بولدوره کیمدی جان ویرن کیمدی بو شان صاحبی

آنلیا قدسیان ندور بنده چلوق مراتبی

گوگده اولان ملکلره کشف اولا بو مکاشفات

گلدی ندا هامی سالون کرب و بلایه بیر نظر

گور نه تجلیّاتیله نفس حسینده وار اثر

بیر ایله اوخ قلج دگوب خوشدی دوشوبدی بی خبر

عین وجودین ایلیوب عین صفات عین ذات

اصلینی بولموسوز اگر کیمدی بو تشنه جان ویرن

آدی حسیندی جدّیدور احمد او شاه ممتحن

آناسی فاطمه حسن قارداشی ابن ابوالحسن

بونلار اولوب سبب یتوب گونه قراریلن ثبات

دوشدی تمام ماسوا شیونه بو خطابدن

نوحه و ناله اوج ایدوب ساکن نه قبابدن

باب مصیبت آچدیلار خلقه بو فتح بابدن

ساخلار عزا ویرونجه جان معتدمینیله ثفات

گلدی گروه انبیا دشت بلایه صف به صف

تاپدیله بیر یارالینی محضر حقده جان به کف

دیدی دوغمیوب یقین بیر آنا بیله بیر خلف

حشره کیمی عقیم‌ دور بیله وجوده امّهات

گوردوله چوخ شکفته دور گل کیمی سیّد انام

ویردیله ختم مرسلین احمده تهنیت تمام

لیک الی بیلینده دور یوخ داخی طاقت قیام

حسرتیله باخور توکور یاش او قُل اِنَّما صفات

هاجریله خدیجه هم گوردی اوغول آناسینی

زلفینه قان یاخوب گیوب اگنینه غم لباسینی

باشلادیلار حسین حسین ساخلادیلار عزاسینی

هانسی عزیزه ئولمه میش یاندی بیله مخدّرات

بیر ایله حالیده حسین یاده سالوب حبیبینی

دردینه چاره ایتماقا آختاروب اوز طبیبینی

تاپدی تمام عمریدن بیر او نفس نصیبینی

ایستدی دلده قالمیا کاشف عشق اولان نکات

عرض ایلدی خدا منیم گرچه اولوبدی اکبریم

اللریم اوسته اوخلانوب ظلمیله تشنه اصغریم

قیزلاریم آغلور اوخشوری باجیلاریم حرملریم

دل سنیلندی سهلدور هم بو بنین هم او بنات

نفسیمه بو وجودیله بزم وصاله حایلم

طایر روح سسلنور تازه حیاته مایلم

آختارورام اودور سنی باب امیده سائلم

دینجه لی سینسا بو قفس عین حیات اولور ممات

لفظ قبول ویرمیشم سن کیمی بی قرینمه

دگسه دوباره اوف دیمم مین بیله یاره سینمه

شمر سو ویرموری خوشام تشنه جگر سکینمه

هر یانا گرچه زینبین گوزیاشی تک آخار فرات

خوشدور الهی قارداشیم ئولماقی سرنگون علم

قولّاری کوی عشقده بی سبب اولمیوب قلم

قانیله ایلیوب همی سرّ شهادتین رقم

هم کتب مصائبون اوّلینه مقدّمات

بولموشم هر نه ویرمیشم لایق آستان دگل

سنسن اوزون ویرن آلان کیمسیه بو نهان دگل

مین بیله عالمه خوشام بو که بیر امتحان دگل

مقصد دل دگل مگر امّت ناجیه نجات

قادر لایزالیدن یتدی حسینه بیر ندا

قطب مدار عالمدی حیرته سالدی بو صدا

لفظ محیطیله اودم اولدی محاط ماسوا

دولدی همان صلائیله نه فلکیله شش جهات

غم یمه یاحسین، سنه بول گله خونبها منم

ویرّم اگر نه ایسته سن معطی هر جزا منم

عهدینه ایلین وفا عاشقه باوفا منم

چون منیلندی حشرده اجر دماءِ سائلات

ازض سنون سما سنون ماه سنون فلک سنون

حور سنون جنان سنون عرش سنون ملک سنون

حوض سنون که تشنه سن بو هامی ماملک سنون

یتمیه جاق به غیر سن کیمسیه بیله التفات

عالمه یاحسین شِفا تربت مقتلونده دور

مرتبه ی مطوّلون شرحی بو مجملونده دور

بیرده عصات امّته حکم نجات الونده دور

هر کسه ایسته سن اوزون مهرایله ویر گلن برات

«صافی» محبّت اهلیسن نور حق اکتساب ایله

هر قدر اولسا ممکنون جرمدن اجتناب ایله

آل علی مصائبین دفتره یاز حساب ایله

عین محاسباتیده خرج اولی بو مکاتبات

 

((صافی تبریزی))

 

خواندن 2622 دفعه

نظر دادن

از پر شدن تمامی موارد الزامی ستاره‌دار (*) اطمینان حاصل کنید. کد HTML مجاز نیست.

جستجو در کل مطالب